सारण के बेटी अभिनेत्री वैष्णवी बालीवुड में डेग धइली


हालही में सारण के बेटी आ बिहार के नवहिन अभिनेत्री पूर्वांचल के परी वैष्णवी के हिन्दी फिलिम – कमली वेडस कमल – के शुरुआत मुम्बई के राममन्दिर में स्क्रिप्ट पूजाई क के क दीहल गइल. सोरहे बरीस के काँच उमिर में भोजपुरी फिलिमन में अपना अभिनय के लोहा मनवा चुकल अभिनेत्री वैष्णवी के महात्वाकांक्षी पहिलका फिलिम – कमली वेडस कमल – के शुभारम्भ रामनवमी का दिने फिलिम के स्क्रिप्ट पूजाई क के हो गइल.

फिल्म नगरी मुम्बई वेस्ट में राम मन्दिर टीसन का नियरा बनल राम मन्दिर में श्रीराम मोशन पिक्चर्स का बैनर तर बने जाक एह फिलिम के स्क्रिप्ट के पूजा पूरा विधि विधान से कइल गइल. पूजा में पुरोहित वेद मंत्रन के उच्चारण करत फिलिम के सफलता के कामना कइलन.

जल्दिए रूपहुला परदा पर धूम मचावे आवे वाली एह फिलिम के जानल मानल फिल्म निर्देशक शशि कांत दूबे अपना निर्देशन से संवरीहें. एकर पटकथा प्रख्यात लेखक राजेश पाण्डेय लिखे जात बाड़न.

पूजाई का मौका प फिल्म उद्योग के अनेके नामी गिरामी लोग मौजूद रहल आ फिलिम के सफलता के शुभकामना कइलसि.


(कृष्ण कुमार)